A península de Camariñas enfrontase ó Atlántico nunha tenaz loita para protexer a tranquilidade da súa ría; onde o océano aloumiña, xa manso, as brancas areas das praias e alimenta e acolle abundantes especies protexidas de aves e unha vexetación deslumbrante.

O visitante quedará atrapado de inmediato pola salvaxe e a vez enigmática beleza da costa norte de Camariñas, enmarcada dentro da impresionante Costa da Morte por cantís esculpidos polo vento e mar que ofrecen misteriosas formas pétreas coma a "Furna dos Infernos" ou a "Pedra do Oso" e praias de especial beleza como as da Reira, Santa Mariña, Arou, Camelle ou Trece.

Entre Cabo Vilán e Arou a paisaxe desborda a mirada máis apaixonada. Declarado como Sitio Natural de interese turístico nacional, ofrece unha enorme riqueza biolóxica con especies de flora e fauna protexidas, como os Araos de Cons, a gaivota tridáctila e o cormorán moñudo, aves en perigo de extinción.

Ó Sur, ó acubillo das bravas acometidas do Atlántico, está a Ría de Camariñas. Os suaves meandros do Río Grande ábrense nunha paisaxe de perfiles máis suaves e tranquilos, con praias como Lago, Area da Vila ou Airiño, e ó borde da cal se atopa a vila de Camariñas.

Dificilmente, o visitante poderá esquecer as paisaxes das costas de Camariñas; así como as do interior, máis protexidas, pero non menos fermosas. Tampouco lle será fácil esquecer a atención das xentes destas terras, as súas festas populares, a súa exquisita gastronomía ou a delicada beleza do Encaixe de Camariñas.